საოცარი ელ კლასიკო მადრიდში. გუშინ, სანტიაგო ბერნაბეუზე გამართული, რეალის და ბარსელონას დაპირისპირება უაღრესად საინტერესო გამოდგა.

გუნდებმა მაყურებელს ულამაზესი სანახაობა აჩუქეს. გატანილი გოლების გარდა, არაერთი სახიფათო მომენტი და უშეღავათო ბრძოლა დაფიქსირდა.

პირველი ტაიმი 1-1 დასრულდა. 28-ე წუთზე, ბრაზილიელი კაზემიროს მიერ გატანილ გოლს ხუთ წუთში ლეო მესიმ ზუსტი დარტყმით უპასუხა.

თამაშის მეორე ნახევარი კიდევ უფრო საინტერესო გამოდგა. 73-ე წუთზე, ხორვატმა ნახევარმცველმა, ივან რაკიტიჩმა ბარსა დააწინაურა.

ამ მომენტს მალევე მადრიდელთა კაპიტნის, სერხიო რამოსის გაძევება მოჰყვა. ათი კაცით დარჩენილმა მასპინძლებმა მაინც შესძლეს წონასწორობის აღდგენა, თავი ხამეს როდრიგესმა გამოიჩინა.

შეხვედრა თითქოს ფრისკენ მიდიოდა, თუმცა მსაჯის მიერ კომპენსირებულ დროში, მესიმ მის გუნდს უმნიშვნელოვანესი სამი ქულა მოუტანა. ეს არგენტინელი სუპერვარსკვლავის მეხუთასე გოლი გამოდგა ბარსას მაისურით.

კატალონიური კლუბი ქულათა რაოდენობით რეალს გაუთანაბრდა, მაგრამ მადრიდელებს ერთი მატჩით ნაკლები აქვთ ჩატარებული.

წელს, რეალმა პრიმერადივიზიონში პირველი საშინაო მარცხი განიცადა. ლა ლიგის დასრულებამდე ხუთი ტურია დარჩენილი.