წალკაში ადგილობრივმა მოსახლეობამ სოფელ ქიზილკილისას გზა გადაკეტა - აქციის მონაწილეები კომპანია „ბი-პი“-ს ავტომობილებს გადაადგილების საშუალებას არ აძლევდნენ.

ადგილობრივი მოსახლეობა წალკაში მიმდინარე გაზსადენის მშენებლობაზე დასაქმებას ითხოვს. ისინი აცხადებენ, რომ ​„ბი-პი“-ს კონტრაქტორ კომპანია „ბეხტელენკას“ ადგილზე 2 000 ადამიანი ჰყავს დასაქმებული და აქედან, მხოლოდ 600-ია ადგილობრივი. აქციის მონაწილეთა განმარტებით, პირველ ეტაპზე ადგილობრივები უნდა დასაქმდნენ.

საუბარია სამხრეთ კავკასიის გაზსადენის გაფართოების პროექტზე. წალკაში ამ დროისთვის გაზის საკომპრესორო სადგურის მშენებლობა მიმდინარეობს.

როგორც საზოგადოებრივს „ბი-პი“-ს წარმომადგენლობის პრესსამსახურში განუცხადეს, კომპანიის წარმომადგენლები აქციის მონაწილეთა მოთხოვნებს იცნობენ, ამ დროისთვისაც, ხვდებიან ადგილობრივებს. ამასთან, კომპანიაში დასძენენ, რომ მათი პრიორიტეტი ადგილობრივი კადრების დასაქმებაა და სხვადასხვა პროექტში დასაქმებულთა 70% საქართველოს მოქალაქეა. რაც შეეხება წალკას, ახალი თანამშრომლების მიღება სამუშაოების მასშტაბებზე იქნება დამოკიდებული.