ჩვენ ვმუშაობთ საქართველოსთან, რომელიც შთამბეჭდავ რეფორმებს ახორციელებს, აძლიერებს დემოკრატიულ, თავდაცვითი ინსტიტუტებისა და სტრუქტურების რეფორმას ახდენს, ასევე ებრძვის კორუფციას, - ამის შესახებ ნატო-ს გენერალურმა მდივანმა იენს სტოლტენბერგმა განაცხადა.
მან ნატო-ს წინაშე არსებულ გამოწვევებსა და სამომავლო გეგმებზე ჯორჯ ვაშინგტონის უნივერსიტეტის ელიოტის საგარეო საქმეთა სკოლაში სიტყვით გამოსვლისას ისაუბრა.
სტოლტენბერგმა საქართველოს საკითხზეც გაამახვილა ყურადღება და აღნიშნა, რომ საქართველოს მთავრობის მიერ გატარებული რეფორმები ნატო-ში გასაწევრიანებელი მცდელობების ნაწილია.
„მსგავსი რეფორმების განხორციელება კარგია, რადგან ამ გზით უახლოვდები ნატო-ს. თუ ნატო-ში გაწევრიანება გსურს, კორუფციასთან ბრძოლა უნდა შეგეძლოს და აძლიერებდე დემოკრატიულ ინსტიტუტებს. საქართველოს სურს ნატო-ში გაწევრიანება და ნატო მათ მხარს უჭერს ამ რეფორმების პროცესში. ნატო-ს კარი ღიაა და მისი გაფართოების საკითხი მხოლოდ აპლიკანტი ქვეყნებისა და ალიანსის წევრების გადაწყვეტილებაზეა დამოკიდებული. სხვას არავის აქვს ჩარევის უფლება“, - განაცხადა იენს სტოლტენბერგმა.
ნატო-ს გენერალური მდივნის თქმით, ალიანსი ევროპაში მშვიდობასა და სტაბილურობას უწყობს ხელს, რის გამოც ნატო გაფართოებას განაგრძობს.
სტოლტენბერგმა მაგალითად მონტენეგრო მოიყვანა და აღნიშნა, რომ სრულ წევრობას ქვეყანა, სავარაუდოდ, ივნისისთვის მიიღებს.