საქართველოს თავდაცვის მინისტრის პირველმა მოადგილემ ლელა ჩიქოვანმა ნატო-საქართველოს არსებითი პაკეტის (SNGP) ფარგლებში სტრატეგიული და ოპერატიული დაგეგმვის ექსპერტი, ვიცე-პოლკოვნიკი კლოდ მურმანი გენერალ გიორგი კვინიტაძის სახელობის მედლით დააჯილდოვა.
მინისტრის პირველმა მოადგილემ სამხედრო ექსპერტს საქართველოში წარმატებული მისიისთვის მადლობა გადაუხადა.
ვიცე-პოლკოვნიკმა კლოდ მურმანმა საქართველოში საკუთარი საქმიანობა შეაჯამა და აღნიშნა, რომ ნატოსთან ურთიერთობის თვალსაზრისით საქართველოში მნიშვნელოვანი პროგრესი შეინიშნება. „ჩვენ ბევრს მივაღწიეთ, თუმცა გასაკეთებელიც რჩება. მთავარია, რომ სწორი მიმართულებით მივდივართ. დროთა განმავლობაში კი შევძლებთ დასახული მიზნის მიღწევას“, - განაცხადა მან.
ბელგიის სამეფოს ოფიცერს მედალი ნატო-საქართველოს არსებითი პაკეტის განხორციელების საქმეში შეტანილი წვლილისთვის გადაეცა.
ვიცე-პოლკოვნიკ კლოდ მურმანის სამშობლოში როტაცია საქართველოში ექვსი თვის მოღვაწეობის შემდეგ განხორციელდა. მას ვიცე-პოლკოვნიკი ვინსენტ ჰენკინეტი შეცვლის, რომელიც გასული წლის აპრილ-ოქტომბერში სტრატეგიული და ოპერატიული დაგეგმვის პროექტის მრჩეველად უკვე მუშაობდა.
სამხედრო ექპერტის საქართველოს თავდაცვის სამინისტროს უწყებრივი მედლით დაჯილდოების ცერემონიალს თავდაცვის უწყების წარმომადგენლები, ნატოს ძირითადი ჯგუფის, ასევე სტრატეგიული და ოპერატიული დაგეგმვის ექსპერტები დაესწრნენ.