პოლიტიკური დებატები - ბოლო ხუთი საათის განმავლობაში პარლამენტის ტრიბუნიდან მწვავე განცხადებები და ურთიერთბრალდებები ისმის.
დებატების დაწყებამდე დეპუტატებმა, მთავრობამ და დიპლომატიურმა კორპუსმა გიორგი მარგველაშვილის ყოველწლიური, უკვე მეოთხე მოხსენება მოისმინა. პრეზიდენტის მიმართვის ნაწილი მმართველი გუნდის კრიტიკას დაეთმო.
დილიდან პარლამენტში ,,მოამბის” რამდენიმე გადამღები ჯგუფი მუშაობს. სახელმწიფოს მეთაურის მწვავე გზავნილები და ასევე მწვავე რეაქციები ,,ქართული ოცნებიდან”. მთავრობა და საპარლამენტო უმრავლესობა მიმართვას მოუმზადებელს უწოდებს.
გამოსვლის მიმართ შენიშვნები აქვს ოპოზიციასაც, რომელმაც დებატებისთვის გამოყოფილი დრო გიორგი მარგველაშვილის მხარდამჭერი განცხადებებისთვისაც გამოიყენა.
არანაკლებ კრიტიკულები იყვნენ მმართველი პარტიის ლიდერები, რომლებმაც ოპონენტებს 2012 წლიდან გატარებული რეფორმები და ეკონომიკური ზრდის ბოლო მაჩვენებლები შეახსენეს.