საპარლამენტო ფრაქცია „ნაციონალური მოძრაობის“ თავმჯდომარის მოადგილის სალომე სამადაშვილის განცხადებით, ქართული სახელმწიფო ყოფნა-არყოფნის წინაშე დგას და ამის შესახებ პრეზიდენტს საკუთარ გამოსვლაში მეტი უნდა ესაუბრა. ამის შესახებ სამადაშვილმა პრეზიდენტ გიორგი მარგველაშვილის საპარლამენტო გამოსვლის შემდეგ გამართული დებატებისას განაცხადა.
„ქართული სახელმწიფო და ახალგაზრდა დემოკრატია, რომელიც ჩვენ შევქმენით, ყოფნა-არყოფნის წინაშე დგას და მე ვფიქრობ, რომ საქართველოს პრეზიდენტი, რომელიც არის აქ ამ დარბაზში, ამ პრობლემაზე ბევრად მეტი უნდა ესაუბრა“, - აღნიშნა სამადაშვილმა.
მისი შეფასებით, საქართველო ოლიგარქიული მმართველობის ქვეყანას ემსაგავსება, სადაც ეცემა ნდობა სახელმწიფო ინსტიტუტებისა და სასამართლოს მიმართ. სამადაშვილმა აღნიშნა, რომ ქვეყანაში იმატებს ნეპოტიზმი და კორუფცია.
„რეალურად, ბიძინა ივანიშვილი და მისგან მართული პოლიტიკური პროექტი „ქართული ოცნების“ სახით, ცდილობს, რომ ქართველ ხალხს შეუქმნას უსუსურობის განცდა, რომ ისინი უძლური არიან სახელმწიფოს წინაშე.
მე ვფიქრობ, რომ პირველი ტიპის ამოცანაა, ქართველ ხალხს დავუბრუნოთ რწმენა, რომ მათი მომავალი მათ ხელშია, რომ მათ ეკუთვნით გადამწყვეტი სიტყვა ამ ქვეყნის მომავალში, შევახსენოთ მათ, მიუხედავად იმისა, რომ ოლიგარქი, რომელიც დღეს მართავს ამ ქვეყანას, რომელსაც მთელი სახელმწიფო მანქანა ემორჩილება, მათ უქმნის განცდას, რომ ისინი არიან სრულიად უსუსურნი, რეალურად, დავითსა და გოლიათს შორის ბრძოლაში სუსტმა შეიძლება, გაიმარჯვოს და სწორედ, ძალაუფლება ამ ქვეყანაში ეკუთვნის ქართველ ხალხს. ეს გზავნილი ამ ხალხს ამ დარბაზიდან უნდა გაეგო უფრო ხმამაღლა და უფრო მკაფიოდ“, - განაცხადა სამადაშვილმა.
მანვე ხაზი გაუსვა, რომ უსუსურობის განცდას ოკუპირებულ ტერიტორიებზე არსებული მდგომარეობაც უღრმავებს მოსახლეობას, რის შესახებაც, მისი შეფასებით, პრეზიდენტის გამოსვლაში აქცენტები არ ყოფილა.