როცა ხელისუფლების წინააღმდეგ ასეთი სერიოზული ბრალდებით გამოდიხარ, ორი-სამი მაგალითი მაინც უნდა მოიყვანო ამ ბრალდების გასამართლებლად, ასე გამოეხმაურა პარლამენტის უმრავლესობის წევრი ზაქარია ქუცნაშვილი, პრეზიდენტის მიერ პარლამენტის წინაშე სიტყვით გამოსვლისას გაკეთებულ განცხადებას.
„მან ბრძანა, რომ უმრავლესობა ქვეყნის პრობლემად იქცა, მაგრამ ერთი არგუმენტიც არ მოუყვანია იმის დასადასტურებლად, რომ ხუთი თვის წინ ხალხის მიერ გაკეთებული არჩევანი იქცა ხალხის პრობლემად. როცა ასეთი სერიოზული ბრალდებით გამოდიხარ, ერთი ორი სამი მაგალითი უნდა მოიყვანო ამ ბრალდების გასამართლებლად. ხომ არ შეიძლება საკითხი დაისვას ასე, რომ სამი წლის წინ გაკეთებული ზოგიერთი არჩევანი იქცა ხალხის პრობლემად“, - განაცხადა ზაქარია ქუცნაშვილმა საზოგადოებრივთან საუბრისას.
საქართველოს პრეზიდენტი პარლამენტის წინაშე ყოველწლიური მოხსენებით წარსდგა. ამ წუთებში, სესიაზე შესვენებაა გამოცხადებული, რომლის დასრულების შემდეგაც საკანონმდებლო ორგანოში დებატები გაიმართება.