საქართველოს პრემიერ-მინისტრი გიორგი კვირიკაშვილი მიიჩნევს, რომ ევროპოლთან ხელშეკრულების გაფორმება ევროინტეგრაციის გზაზე მნიშვნელოვანი ნაბიჯია, - ამის შესახებ გიორგი კვირიკაშვილმა მთავრობის სხდომაზე განაცხადა.
როგორც მთავრობის მეთაურმა აღნიშნა, ორი დღის წინ საქართველოს შინაგან საქმეთა სამინისტროსა და ევროპის პოლიციას შორის გაფორმდა ოპერატიული და სტრატეგიული თანამშრომლობის შეთანხმება.
„ეს არის უმნიშვნელოვანესი შეთანხმება, რომლითაც საქართველო ხდება ევროპული წესრიგის ნაწილი. ამ დოკუმენტის თანახმად, გვექნება პრაქტიკულად, ონლაინ რეჟიმში თანამშრომლობა ევროპის პოლიციის სტრუქტურებთან. ეს თანამშრომლობა ითვალისწინებს გაცილებით მეტ ოპერატიულ შეხებას ყოველდღიურ რეჟიმში, როგორც ევროპოლთან, ასევე ევროკავშირის წევრი სახელმწიფოების ანალოგიურ სტრუქტურებთან, რაც ასევე ძალიან მნიშვნელოვანია ვიზალიბერალიზაციის ფონზე“, - განაცხადა გიორგი კვირიკაშვილმა.
მისივე თქმით, ევროპოლთან გაფორმებული შეთანხმებით ევროპა აღიარებს საქართველოს, როგორც ძალიან მნიშვნელოვან პარტნიორს.
„მინდა, შინაგან საქმეთა სამინისტროს მადლობა გადავუხადო გაწეული სამუშაოსთვის და ვთქვა, რომ ეს ხელშეკრულება უპირველეს ყოვლისა არის პასუხისმგებლობა, რომელიც ღირსეულად უნდა ვატაროთ, როგორც ევროპის სანდო პარტნიორებმა. ეს არის ძალიან მნიშვნელოვანი ნაბიჯი ევროინტეგრაციის გზაზე“, - აღნიშნა გიორგი კვირიკაშვილმა.