3 ოქროს, 1 ვერცხლის, 2 ბრინჯაოს მედალი და არაოფიციალურ გუნდურ ჩათვლაში პირველი ადგილი. ასეთი შედეგით დაასრულა საქართველოს ვაჟ ძიუდოისტთა ნაკრებმა თბილისის გრან პრის გათამაშება.
ჩემპიონები ლუხუმ ჩხვიმიანი, ლაშა გიუნაშვილი და ადამ ოქრუაშვილი გახდნენ. ვერცხლის მედალი, ამირან პაპინაშვილმა მოიგო, ხოლო ბრინჯაოებს უშანგი მარგიანი და ლევან მატიაშვილი დაეუფლნენ.
ტურნირის დაკვნით დღეს, მძიმეწონოსანმა ადამ ოქრუაშვილმა ფინალში უკრაინელი სტანისლავ ბონდარენკო შებოჭა და სუფთა გამარჯვებას მიაღწია.
აღსანიშნავია, რომ საქართველოს ნაკრებმა აღნიშნულ შეჯიბრზე გადახალისებული შემადგენლობით იასპარეზა. ირაკლი ცირეკიძემ, წამყვანი ძიუდოისტები დაასვენა, რომლებიც პოლონეთში გასამართი ევროპის ჩემპიონატისთვის ემზადებიან. კონტინენტის პირველობამდე კი, ანტალიის გრან პრი გაიმართება.