ე.წ. ციანიდის საქმეში ბრალდებული დეკანოზი გიორგი მამალაძე სასამართლომ პატიმრობაში დატოვა, ამის შესახებ „მოამბის“ ჟურნალისტი ადგილიდან იუწყება. მოსამართლემ აღნიშნული გადაწყვეტილების მიზეზად მოწმეებზე ზეწოლის საშიშროება დაასახელა.

დაცვის მხარემ სასამართლოს შუამდგომლობით მიმართა, აღკვეთის ღონისძიება პატიმრობა 20 ათასლარიანი გირაოთი შეცვლილიყო.

ბრალდებულის ადვოკატებმა საქმეში არსებულ ახალ გარემოებად დეკანოზის ჯანმრთელობის მდგომარეობის გაუარესება, კერძოდ კი, გულის პრობლემები დაასახელეს. როგორც ადვოკატებმა აღნიშნეს, დეკანოზს გულზე ოპერაცია სჭირდება.

პროკურატურა დეკანოზის პატიმრობაში დატოვებას მოითხოვდა, ვინაიდან პროკურორების განცხადებით, გამოძიება გრძელდება და არსებობს მოწმეებზე ზეწოლის საფრთხე.

თბილისის საქალაქო სასამართლომ დეკანოზ გიორგი მამალაძის აღკვეთის ღონისძიების მიზანშეწონილობის საკითხზე დღეს იმსჯელა.

როგორც საზოგადოებრივ მაუწყებელს გიორგი მამალაძის ადვოკატმა, მიხეილ რამიშვილმა განუცხადა, როდესაც სასამართლო აკმაყოფილებს მოთხოვნას წინასასამართლო სხდომის გადადების შესახებ, პროცედურულად სასამართლო ვალდებულია, იმსჯელოს აღკვეთის ღონისძიების, კერძოდ კი, პატიმრობის მიზანშეწონილობაზე.

საქართველოს მთავარმა პროკურატურამ დეკანოზ გიორგი მამალაძის წინასასამართლო სხდომის ერთი თვით გადავადება მოითხოვა.

პროკურატურის ეს შუამდგომლობა სასამართლომ დააკმაყოფილა და პროცესი 5 მაისამდე გადადო.

ე.წ. ციანიდის საქმესთან დაკავშირებით, დეკანოზი გიორგი მამალაძე 13 თებერვალს დააკავეს. მას აღკვეთის ღონისძიების სახით, პატიმრობა აქვს შეფარდებული.