ზუგდიდში, ლტოლვილთა და განსახლების სამინისტროს კომისიის შენობაში დევნილები ძალის გამოყენებით შეიჭრნენ.

ისინი სამინისტროს წარმომადგენლებისგან ბინებს ითხოვენ. მათი განცხადებით, ბინები მათზე დაბალქულიანმა დევნილებმა მიიღეს, მაშინ, როცა მათ უფრო მაღალი ქულები ჰქონდათ.

დევნილები, რომლებიც შენობაში შეიჭრნენ, მაღალი ქულის მფლობელები იყვნენ, მათ დაახლოებით 10-11 ქულა ჰქონდათ. ამ დროს კი ბინები, 8 ქულიანმა დევნილებმა მიიღეს.

დევნილებს ლტოლვილთა და განსახლების მინისტრის მოადგილე გიგა გიორგაძე შეხვდა. იგი მოქალაქეებს დაჰპირდა, რომ თითოეულ მათგანს ინდივიდუალურად შეხვდება და მათ პრობლემებს შეისწავლის.

ჯამში ბინით 144 დევნილი დაკმაყოფილდა, სამინისტროში კი ბინის მოთხოვნის შესახებ 5000-მდე განცხადება იყო შესული.

ამჟამად აფხაზეთიდან დევნილები, ძირითადად, ამორტიზებულ ბინებსა და ნაქირავებ ფართებში ცხოვრობენ.