საქართველოში მცხოვრები აზერბაიჯანელი მოსახლეობა ნოვრუზ ბაირამს ანუ გაზაფხულის შემოსვლას აღნიშნავს. დღესასწაულს განსაკუთრებით მარნეულში ზეიმობენ.
ნოვრუზ ბაირამის დღესასწაული აზერბაიჯანელებს საქართველოს პრეზიდენტმა და პრემიერ მინისტრმა მიულოცეს.
გიორგი მარგველაშვილმა მარნეულის ქუჩებში სპეციალურად დღევანდელი დღისთვის მოწყობილი სტენდები დაათვალიერა, თეატრალიზებულ წარმოდგენას დაესწრო და აზერბაიჯანული ჩაიც დააგემოვნა. რის შემდეგაც პრეზიდენტმა მარნეულის ცენტრში ახლად აშენებული ბიბლიოთეკის შენობა გახსნა.
სპეციალურად მოწყობილი სცენიდან კი პრეზიდენტმა და პრემიერმა მოხახლეობას ნოვრუზ ბაირამი მიულოცეს. გიორგი კვირიკაშვილმა ადგილობრივებს ბაირამობა ორ ენაზე ქართულ და აზერბაიჯანულ ენებზე მიულოცა .
მარნეულში დღეს აღმასრულებელი ხელისუფლების სხვა წარმომადგენლებიც იმყოფებოდნენ. სახალხო სეირნობა ქუჩებში დილიდან დაიწყო. გადაიკეტა ქალაქის ცენტრალური მოედანი.გამოიფინა ადგილობრივი ნაწარმი.
ღონისძიებებში აქტიურად მონაწილეობდნენ მოძრაობის თეატრის მსახიობები. მარნეულის მთავარ სცენაზე კი ადგილობრივი ანსამბლების მონაწილეობით კონცერტი გაიმართა.