იურიდიული კომიტეტის წევრთა უმრავლესობა პრეზიდენტის ვეტოს დაძლევას და ფარული საგამოძიებო მოქმედებების შესახებ კანონის კვლავ არსებული ფორმით დატოვებას მიიჩნევს მიზანშეწონილად.
დღეს, პარლამენტის იურიდიული კომიტეტის სხდომაზე პრეზიდენტ გიორგი მარგველაშვილის მოტივირებულ შენიშვნებს მხარი მხოლოდ ოპოზიციამ დაუჭირა.
კენჭისყრამდე იურიდიულ კომიტეტში პრეზიდენტის საპარლამენტო მდივანმა დეპუტატებს ორი მთავარი შენიშვნა გააცნო. პირველის თანახმად, ოპერატიულ-ტექნიკური სააგენტო არ უნდა შედიოდეს სახელმწიფო უსაფრთხოების სამსახურის მმართველობის სფეროში და პრემიერ მინისტრს უნდა დაექვემდებაროს. ასევე, უნდა იყოს არა საჯარო სამართლის იურიდიული პირი, არამედ სპეციალური დანიშნულების დაწესებულება.
მეორე შენიშვნის თანახმად, ელექტრონული კომუნიკაციის კომპანიები ფინანსური ვალდებულებებისაგან უნდა გათავისუფლდნენ და საჭიროების შემთხვევაში, სახელმწიფოსთან სამართლიანი ანაზღაურება მიიღონ.
პრეზიდენტის მოტივირებული შენიშვნების განხილვას კომიტეტის სხდომაზე კამათი მოყვა.
საქართველოს პრეზიდენტმა გიორგი მარგველაშვილმა ე.წ. ფარული მოსმენების შესახებ კანონთა პაკეტს ვეტო გუშინ დაადო და მოტივირებული შენიშვნებით პარლამენტს გადაუგზავნა.