საკონსტიტუციო კომისიას შესაძლოა უფლებამოსილება გაეზარდოს. საკონსტიტუციო კომისიაში შესული ახალი ინიციატივა ქვეყანაში ე.წ. სტრასბურგის მოდელის ამოქმედებას გულისხმობს.
კონსტიტუციონალისტების მიერ მომზადებული წინადადების მიხედვით, ჩნდება შანსი, რომ საერთო სასამართლოების მიერ გამოტანილი გადაწყვეტილებები ქვეყნის შიგნითვე-საკონსტიტუციო სასამართლოში გადაისინჯოს და დადგინდეს, დაირღვა თუ არა კონკრეტული განაჩენით ქვეყნის უზენაესი კანონი.
ინიციატივას არ იზიარებს ოპოზიციური პარტიების ნაწილი. მმართველი გუნდი საკითხის გასაანალიზებლად დროს ითხოვს.
ერთიანი პოზიცია არ არსებობს კიდევ ერთი ინიციატივის გარშემო. კომისია სახალხო დამცველის არჩევის წესის შეცვლაზეც მსჯელობს. არ არის გამორიცხული, რომ ომბუდსმენის ასარჩევად საპარლამენტო უმცირესობის ხმებიც გახდეს საჭირო.