#სპორტი უეფას ჩემპიონთა ლიგის გათამაშებაში, ყველა მეოთხედფინალისტი გუნდი ცნობილია.

გუშინ, მონაკოსა და მადრიდში დარჩენილი ორი საპასუხო მერვედფინალი შედგა.

ლუი მეორის სახელობის სტადიონზე, მონაკომ მანჩესტერ სიტის უმასპინძლა. ლეონარდო ჟარდიმის გუნდს, პირველი შეხვედრა იტიჰადზე 3-5 ჰქონდა წაგებული და თითქოს წყვილის ფავორიტად ინგლისელები მიიჩნეოდნენ, თუმცა მონაგესკებმა, განსაკუთრებით პირველ ტაიმში, პრაქტიკულად, უშეცდომო ფეხბურთი ითამაშეს.

მასპინძლებმა ტაიმი მბაპეს და ფაბინიოს გოლებით 2-0 მოიგეს. თამაშის მეორე ნახევარში, ხოსეპ გვარდიოლას გუნდი გააქტიურდა და ლეროი სანემ ერთი ბურთი გაქვითა. ამ შედეგით, მანჩესტერი გადიოდა შემდგომ ეტაპზე, თუმცა 77-ე წუთზე ბაკაიოკომ თავური დარტყმით, მონაკოს საბოლოო გამარჯვება და მეოთხედფინალის საგზური მოუტანა.

გუშინვე, მადრიდის ატლეტიკოს და ლევერკუზენის ბაიერის დაპირისპირება 0-0 დასრულდა. ორი მატჩის ჯამში კი, ესპანური კლუბი ითამაშებს მომდევნო ეტაპზე. მეოთხედფინალების წილისყრა, შვეიცარიის ქალაქ ნიონში, ხვალ გაიმართება და მის პირდაპირ ტრანსლაციას საზოგადოებრივი მაუწყებლის მეორე არხი, 15 საათიდან შემოგთავზებთ.