აჭარის მთავრობის თავმჯდომარის, ზურაბ პატარიძის განცხადებით, ბათუმის მოვლენებთან დაკავშირებით აქტიურად მიმდინარეობს საგამოძიებო მოქმედებები.
პატარიძე ვარაუდობს, რომ უახლოეს მომავალში გაირკვევა, იკვეთება თუ არა სისხლის სამართლის დანაშაული ბათუმში განვითარებული მოვლენების შედეგად.
აჭარის მთავრობის თავმჯდომარე ბათუმის აქციას მართულ პროცესად მიიჩნევს.
„მიმდინარეობს აქტიურად საგამოძიებო ქმედებები. ეს არის ძალიან მნიშვნელოვანი საქმე და უნდა იყოს შესწავლილი. დაველოდოთ გამოძიების შედეგებს. ვფიქრობ, რომ უახლოეს მომავალში ჩვენ გვექნება ინფორმაცია სისხლის სამართლის დანაშაული იკვეთება თუ არა. ფაქტია, რომ ეს იყო მართული პროცესი. დაგეგმეს ადამიანებმა, ვისაც არ უყვარს თავისი ქვეყანა და ფაქტია, რომ აქ არის ჩართული პოლიტიკური ძალები“,- განაცხადა ზურაბ პატარიძემ.
ამასთან, ის აჭარის საპატრულო პოლიციის უფროსის კახა ბუხრაძის მიერ, შესაძლო, ქსენოფობიურ გამოთქმებს უარყოფს.
აქცია ბათუმში 11 მარტს, დაახლოებით 16:00 საათზე, ჭავჭავაძის ქუჩაზე, „ბათუმი – პლაზასთან“ დაიწყო.
აქციის მიზეზად მონაწილეები ასახელებდნენ ინციდენტს საპატრულო პოლიციასა და მოქალაქეს შორის.
პატრულმა მოქალაქე ჯერ არასწორი პარკირებისთვის დააჯარიმა, შემდეგ კი სიტყვიერი შეურაცხყოფისთვის დააკავა. დააკავეს მოქალაქის თანმხლები პირიც.
თვითმხილველები ამბობდნენ, რომ პოლიციამ მოქალაქეს ფიზიკური შეურაცხყოფა მიაყენა და ამან გამოიწვია სპონტანური აქცია ადგილზე, რომელიც მოკლე ხანში ხალხმრავალი გახდა.
აქციის მონაწილეები მოითხოვდნენ დაკავებული მოქალაქის და მისი თანმხლები პირის გათავისუფლებას და ასევე, აჭარის საპატრულო პოლიციის უფროსის გადაყენებას, რომელიც, მათი თქმით, საპატრულო პოლიციის თანამშრომლებს აიძულებდა ჯარიმების გამოწერას.
საღამოს 19:00 საათზე „ბათუმი-პლაზასთან“ აქციის პარალელურად დაიწყო მეორე აქცია აჭარის პოლიციის დეპარტამენტის შენობასთან, სადაც აქციის მონაწილეთა რაოდენობა გაიზარდა.
აქციის მონაწილეები დაკავებულების გათავისუფლებას და საპატრულო პოლიციის უფროსის გათავისუფლებას ითხოვდნენ.
აქციაზე მივიდნენ სამთავრობო და ოპოზიციური პარტიის წევრები.
აქციაზე დაშავდა 20-ზე მეტი ადამიანი, პოლიციელები და აქციის მონაწილეები. დაშავდა აჭარის უმაღლესი საბჭოს წევრი, რომელსაც ქვა მოარტყეს.
დაახლოებით ღამის 03:00 საათზე შს სამინისტრომ აქციაზე დაკავებული ექვსი პირი გაათავისუფლა, თუმცა აქცია არ შეწყვეტილა.
12 მარტს, დილით, ცნობილი გახდა, რომ პოლიციამ სულ 40-მდე ადამიანი დააკავა.
გამოძიება სისხლის სამართლის კოდექსის ორი მუხლით მიმდინარეობს – 225-ე და 353-ე პრიმა, რაც ნიშნავს მასობრივი არეულობის ორგანიზებას ან ხელმძღვანელობას, რასაც თან ახლავს ძალადობა, რბევა, ცეცხლის წაკიდება, იარაღის ან ასაფეთქებელი მოწყობილობის გამოყენება, ანდა ხელისუფლების წარმომადგენლებისათვის შეიარაღებული წინააღმდეგობა.