„ბავშვთა სამყაროს“ მოვაჭრეებისთვის ხანძრის შედეგად მიყენებულ ზარალს სახელმწიფო სრულად ვერ აანაზღაურებს“, - ამის შესახებ ჟურნალისტებს საკრებულოს თავმჯდომარე გიორგი ალიბეგაშვილმა განუცხადა, რომელიც დღეს დაზარალებულ მოვაჭრეებს საკრებულოში შეხვდა.
ალიბეგაშვილის განმარტებით, საქმე ეხება კერძო მესაკუთრესა და მოიჯარეებს შორის დავას, რა დროსაც მესაკუთრეს აქვს ვალდებულება, რომ ზარალი აანაზღაუროს. თუმცა საკრებულოს თავმჯდომარე აქვე ამბობს, რომ სახელმწიფოს მიერ ზარალის ანაზღაურებაზე საუბარი, შესაძლოა, სასამართლოს გადაწყვეტილების შემდეგ დაიწყოს.
რაც ეხება ერთჯერად კომპენსაციებს, როგორც ალიბეგაშვილმა აღნიშნა, თანხის ზუსტი ოდენობა უახლოეს დღეებში გახდება ცნობილი, ხოლო კომპენსაციების გაცემა მას შემდეგ დაიწყება, რაც დაზარალებულების სრული სია მიეწოდებათ.
თბილისის საკრებულოს შენობის წინ “ბავშვთა სამყაროში” გაჩენილი ხანძრის შედეგად დაზარალებულმა მოვაჭრეებმა აქცია გამართეს, ხოლო მათი ნაწილი საქართველოს მთავრობის ადმინისტრაციისკენ გაემართა.
მოვაჭრეების ნაწილმა დღეს საკრებულოს თავმჯდომარესთან შეხვედრა გამართა, სადაც კომპენსაციების გაცემისა და ზარალის ანაზღაურების საკითხები განიხილეს. ისინი საკრებულოში გამართული შეხვედრით უკმაყოფილოები არიან, ვინაიდან ზარალის სრულად ანაზღაურებაზე უარი მიიღეს.
როგორც მოვაჭრეებმა განაცხადეს, საკრებულოში მათ დაჰპირდნენ, რომ კომპენსაციებს ერთჯერადად გასცემენ, თუმცა რა რაოდენობის თანხას მიიღებენ, ამის შესახებ ინფორმაცია არ აქვთ. მათივე თქმით, აპირებენ, კვირას მთავრობის ადმინისტრაციის წინ შიმშილობა დაიწყონ და იქამდე არ შეწყვიტონ, ვიდრე მათი მოთხოვნები არ შესრულდება.
„ბავშვთა სამყაროს“ დაზარალებული მოვაჭრეები თბილისის საკრებულოსგან მოითხოვენ ალტერნატიული ფართის გამოყოფასა და ზარალის ანაზღაურებას. მათი განცხადებით, თბილისის მერიის სარეზერვო ფონდს ამის შესაძლებლობა აქვს, თუმცა საკრებულოსგან თანხმობაა საჭირო.