კიდევ ერთი სადავო და ვეტოდაძლეული კანონი დღეიდან ოფიციალურად ამოქმედდა. სასამართლო რეფორმის მესამე ტალღის შედეგად, მართლმსაჯულების სფეროში რამდენიმე ცვლილებაა.

მოსამართლეობის კანდიდატებს ახალი კრიტერიუმებით შეარჩევენ, სასამართლოს თავმჯდომარეებს კი კვლავ იუსტიციის საბჭო დაამტკიცებს. სიახლეა ისიც, რომ საკონსტიტუციო და უზენაესი სასამართლოს ყოფილი და მოქმედი მოსამართლეების ნაწილი სამწლიანი გამოსაცდელი ვადის გავლისგან გათავისუფლდება.

მოსამართლეთა მიერ დისციპლინური გადაცდომის ფაქტებს კი სპეციალური ინსპექტორი შეისწავლის. იუსტიციის სამინისტროს მიერ მომზადებული კანონის ძალაში შესვლის მიუხედავად, დოკუმენტის ცალკეულ პუნქტებს ოპოზიციის ნაწილი და მესამე სექტორი ამ დრომდე აკრიტიკებს.