თურქეთის პრეზიდენტი ჰოლანდიას „ბანანის რესპუბლიკას“ უწოდებს და საერთაშორისო საზოგადოებას მიმართავს, თურქი მინისტრების როტერდამში არშეშვების გამო, ჰოლანდიის მიმართ სანქციები დააწესონ.
რეჯეფ ტაიპ ერდოღანის თქმით, მსოფლიომ საკუთარი თვალით იხილა, რომ ისინი ვინც თურქეთს ადამიანის უფლებების დაცვაზე, კანონის უზენაესობასა და დემოკრატიაზე ლექციებს წლების განმავლობაში უკითხავდნენ, თავად ძალიან შორს დგანან ამ ფასეულობებისგან.
ავსტრიის, შვეიცარიისა და გერმანიის შემდეგ, ჰოლანდიის ხელისუფლება, მეოთხე ევროპული ქვეყანა გახდა, რომელმაც თურქებს სააგიტაციო მიტინგის გამართვის ნება არ დართო და შაბათს, როტერდამში ჩასული საგარეო საქმეთა მინისტრის თვითმფრინავი უკან გააბრუნა. მოგვიანებით კი ოჯახის საკითხებში თურქი მინისტრი დეპორტაციის გზით, ქვეყნიდან გააძევა.
სააგიტაციო მიტინგი აპრილში, თურქეთში დაგეგმილი რეფერენდუმისთვის იმართებოდა, სადაც მოსახლეობამ პრეზიდენტის უფლებამოსილების გაფართოების საკითხს კენჭი უნდა უყაროს.
როტერდამიდან გაბრუნებული საგარეო საქმეთა მინისტრი სააგიტაციო მიტინგს საფრანგეთის ქალაქ მეცში დაესწრო და ჰოლანდია ფაშიზმის დედაქალაქად გამოაცხადა.
ჰოლანდიის პრემიერმინისტრი აცხადებს, რომ კონფრონტაციას არ ეძებს და კონფლიქტის დეესკალაციისთვის ყველაფერს გააკეთებს, თუმცა თურქი ლიდერების განცხადებები ამის წინაპირობას არ იძლევა.