სენაკში დაკარგული რვა წლის ნიკა გაბეჩავას ბებია, თამარ წურწუმია, ითხოვს, სამძებრო-სამაშველო სამუშაოები ზღვის სანაპიროზე გაგრძელდეს.
როგორც მან „მოამბესთან“ ინტერვიუში განაცხადა, დღეს პირადად მიიღო მონაწილეობა მდინარე ტეხურასთან მიმდინარე სამძებრო სამუშაოებში. ის სამართალდამცავებსა და სამაშველო სამსახურის წარმომადგენლებს მადლობას უხდის გაწეული სამსახურისათვის, თუმცა ფიქრობს, რომ ბავშვი, შესაძლოა, მდინარეს ზღვაში ჩაეტანა, ამიტომ საჭიროდ მიიჩნევს, სამძებრო სამუშაოები ზღვის სანაპიროსთან გაგრძელდეს.
გარდა ამისა, დაკარგული ნიკა გაბეჩავას ბებია საქმის გადაკვალიფიცირებას ითხოვს და აცხადებს, რომ 129-ე მუხლი, რომელიც დაუხმარებლობას გულისხმობს, მკვლელობის მუხლით უნდა შეიცვალოს.
თამარ წურწუმია ბრალდებულის დედას მიმართავს და მისგან პასუხს ითხოვს, ვინაიდან თუ იცოდა, რომ თავის შვილს ჯანმრთელობის პრობლემები ჰქონდა, რატომ არ მკურნალობდა და ქუჩაში თავისუფლად გადაადგილების საშუალებას რატომ აძლევდა.
სენაკში რვა წლის ბიჭი 24 თებერვალს დაიკარგა. შინაგან საქმეთა სამინისტროს ინფორმაციით, ბიჭი მდინარის პირას ჯართს აგროვებდა, რა დროსაც წყალში ჩავარდა.
უწყების განცხადებით, ამ დროს მდინარესთან კიდევ ერთი პირი იმყოფებოდა, რომელიც ამჟამად დაკავებულია. მის წინააღმდეგ საქმე 129-ე მუხლითაა აღძრული, რაც დაუხმარებლობას გულისხმობს.
ბრალდებულს აღკვეთის ღონისძიების სახით პატიმრობა შეეფარდა.