„ვიკილიქსი” ფარული მიყურადების შესახებ მორიგ სკანდალურ ინფორმაციას აქვეყნებს.

ამჯერად ორგანიზაციის სამიზნე, შეერთებული შტატების დაზვერვის ცენტრალური სააგენტო გახდა.

„ვიკილიქსში“ აცხადებენ, რომ ისინი გაასაჯაროვებენ ათასობით დოკუმენტს, რომლებიც დაზვერვის სააგენტოს მიერ ტელეფონის, ტელევიზორისა და კომპიუტერის საშუალებით მასობრივ თვალთვალს ადასტურებს.

გამოქვეყნებული დოკუმენტების პირველი ნაწილი ცხადყოფს, რომ ცენტრალური სადაზვერო უწყება კომპიუტერული ვირუსების საშუალებით, „ვინდოუსის”, „ანდროიდის”, „აიოსის”, „ოესიქსის’, „ლინუქსისა” და „ინტერნეტ როუტერების” ოპერაციულ სისტემებში აღწევს.

ეს ვირუსები ამერიკელი და ბრიტანელი სპეციალისტების მიერ არის შემუშავებული. დოკუმენტებიდან ირკვევა, რომ 2014 წლის ივნისიდან, სამსუნგის ე.წ სმარტ ტელევიზორებისთვის სპეციალური პროგრამა დაიწერა, რომელიც გამორთულ რეჟიმში ოთახში მიმდინარე საუბარს იწერს, ჩართვის შემდეგ კი WIFI-ის საშუალებით, მათ დაზვერვის სერვერებზე აგზავნის.

აიფონებისა და აიპადებისთის საგანგებო განყოფილებაც კი შეიქმნა, რომელიც ობიექტის ადგილმდებარეობის დადგენას, მოწყობილობის ვიდეოკამერისა და მიკროფონის გააქტიურებასა და მიმოწერასთან წვდომას უზრუნველყოფდა.

დაზერვას ასევე „ვოთსაფისა“ და სხვა პროგრამების საშუალებით განხორციელებული მიმოწერის წაკითხვის საშუალება აქვს.

„ვიკილიქსი” მოპოვებული დოკუმენტების გამოქვეყნებას ეტაპობრივად გეგმავს.