ესპანეთის პრიმერადვიზიონში 25-ე ტურის სამი შეხვედრა გაიმართა. მოულოდნელი შედეგი დაფიქსირდა სანტიაგო ბერნაბეოზე, სადაც მადრიდის რეალმა ლას პალმასთან დაკარგა ქულები.

თამაში მაღალშედეგიანი და უხეში გამოდგა. მადრიდელები მერვე წუთზე ისკომ დააწინაურა. ზუსტად ორ წუთში, სტუმართა ნახევარმცველმა ტანაუსუ დომინგესმა წონასწორობა აღადგინა. ტაიმი 1-1 დასრულდა.

მეორე ნახევრის სტარტზე, მადრიდელები 10 კაცით დარჩნენ მოედანზე. მთავარმა არბიტრმა გარეთ ბეილი გააძევა. ლას პალმასმა რიცხობრივი უპირატესობით კარგად ისარგებლა და სამი წუთის ინტერვალში, ორჯერ აიღო მეტოქის კარი.

გოლები ჯონათან ვიერამ და კევინ პრინს ბოატენგმა გაიტანეს. სამეფო გუნდი მარცხისგან რონალდომ იხსნა. პორტუგალიელმა სუპერვარსკვლავმა 86-ე და 89-ე წუთებზე დუბლი შეასრულა და თამაშის საფინალო ანგარიში დააფიქსირა, ფრე 3-3. ამ შედეგის შემდეგ, მადრიდის რეალმა ლა ლიგაში ლიდერობა დათმო. პირველ ადგილზე ბარსელონამ გადაინაცვლა.