სამხედრო მოსამსახურის ჯანმრთელობის მდგომარეობა, რომელმაც ავტომატური ცეცხლსასროლი იარაღიდან გასროლით სხეულის დაზიანება მიიღო, მძიმეა, ამის შესახებ „მოამბესთან" ინტერვიუში ექიმმა და თავდაცვის მინისტრის მოადგილემ განაცხადეს.
შემთხვევა დღეს უფლისციხის სამხედრო ბაზაზე მოხდა. 22 წლის ბ.შ-ს სასწრაფო ოპერაცია ჩაუტარდა. მას ჭრილობა თავის არეში აქვს მიყენებული.
თავდაცვის სამინისტროს ინფორმაციით, მომხდართან დაკავშირებით, ინფორმირებულია დაჭრილი სამხედროს ოჯახი.
„საავადმყოფოში იმყოფება თავდაცვის მინისტრის მოადგილე ზაალ კაპანაძე და სამედიცინო დეპარტამენტის წარმომადგენლები. მომხდარის შესახებ ინფორმირებული არიან დაშავებული სამხედრო მოსამსახურის ოჯახის წევრები.
ფაქტთან დაკავშირებით აღძრულია სისხლის სამართლის საქმე, 115-ე მუხლით, რაც თვითმკლელობის მცდელობას გულისხმობს. საქმეს სამხედრო პოლიცია იძიებს. შემთხვევის ადგილზე იმყოფება სამხედრო პოლიციის უფროსი" - აღნიშნულია თავდაცვის სამინისტროს განცხადებაში.