ზაზა ფაჩულიას პირადი რეკორდი „გოლდენ სტეიტის“ შემადგენლობაში. ქართველმა კალათბურთელმა დღეს დილით "ფილადელფია სევენთი სიქსერსს" 16 ქულა ჩაუგდო, რასაც 5 მოხსნა და ორი შედეგიანი გადაცემა დაუმატა.

აღსანიშნავია, რომ ზაზამ ეს ყველაფერი 14 წუთში მოასწრო. ფაჩულიამ ხუთიდან ხუთი ორქულიანი და შვიდიდან ექვსი საჯარიმო ტყორცნა გამოიყენა. მისმა "უორიორზმა" კი, რეგულერული სეზონის მორიგი გამარჯვება მოიპოვა.

"გოლდენ სტეიტს" ერთმატჩიანი პაუზის შემდეგ კევინ დიურანტი დაუბრუნდა, რომელიც თამაშის საუკეთესო ბომბარდირი გახდა 27 ქულით.

21 ქულა მიითვალა აქტივში კლეი ტომპსონმა. შეხვედრა სტივ კერის გუნდმა 119-108 მოიგო და კვლავ დამაჯერებლად ლიდერობს დასავლეთ კონფერენციას. "უორიორზი" მორიგ მატჩს ზეგ, ვაშინგტონ "ვიზარდსის" წინააღმდეგ ჩაატარებს.