„ენგურჰესის“ ორკვირიანი გაჩერების შედეგად, ოკუპირებული აფხაზეთის რეგიონი გრაფიკზე გადავა.

ამის შესახებ საზოგადოებრივ მაუწყებელს „ენგურჰესის“ გენერალურმა დირექტორმა ლევან მებონიამ განაცხადა.

მისივე ინფორმაციით, „ენგურჰესის“ გაჩერება დათვალიერების და სამუშაოთა მოცულობის დადგენის მიზნით ხდება.

„რაც შეეხება აფხაზეთის კვებას, ელექტორენერგია რეგიონს მიეწოდება რუსეთის ენერგოსექტორიდან და ნაწილი საქართველოს ენერგოსისტემიდან. არის ხაზი, რომელიც შემოდის „ადლერის“ მხრიდან აფხაზეთში და დაახლოებით 60%-70% მარაგდება იმ ხაზით, დანარჩენი ჯერჯერობით ჩვენგან. გამორთვები დღეს ჰქონდათ, ალბათ აფხაზეთი გრაფიკზე გადავა.

დათვალიერების შემდეგ თუ არ აღმოჩნდა რამე ისეთი დაზიანება, რომელიც ხელს შეუშლის გაშვებას, ვფიქრობთ ამ სამუშაოებს 5 მარტამდე დავამთავრებთ“,- განაცხადა მებონიამ.

ცნობისათვის, იანვარში „ენგურჰესისა“ და „ვარდნილჰესების“ მიერ გამომუშავებული ელექტროენერგია, თითქმის მთლიანად აფხაზეთის რეგიონმა წაიღო.

ორივე ჰიდროსადგურის მიერ გენერირებული ელექტროენერგია ჯამში 265 მლნ.კვტ.სთ-ია.

იანვარში აფხაზეთის რეგიონმა 252 მლნ.კვტ.სთ ელექტროენერგია გამოიყენა, რაც 16 მლნ.კვტ.სთ-ით მეტია, შარშანდელი წლის ანალოგიურ პერიოდთან შედარებით.

აფხაზეთის რეგიონს ბუნებრივი აირი არ აქვს და სამრეწველო და საყოფაცხოვრებო დანიშნულებისთვის მთლიანად ელექტროენერგია გამოიყენება.

ამასთანავე, მოწესრიგებელია ელექტროგადამცემი ხაზები, რის გამოც ქსელში დიდი რაოდენობით ელექტროენერგია იკარგება.