როდესაც ხდება პიროვნების დაკავება ასეთი ნივთიერებით, როდესაც მიემგზავრება პატრიარქთან, ჩვენ არ გვაქვს უფლება, არ დავუშვათ ყველანაირის სცენარი, ამის შესახებ საქართველოს პრემიერმინისტრმა გიორგი კვირიკაშვილმა დეკანოზ გიორგი მამალაძის საქმესთან დაკავშირებით, ტელეკომპანია „იმედის“ ეთერში, მიუნხენიდან პირდაპირი ჩართვის დროს განაცხადა.
მისი თქმით, სწორედ ამიტომ საქართველოს მთავრობამ მიიღო შესაბამისი პრევენციული ზომები, რათა არ მომხდარიყო დიდი უბედურება. როგორც პრემეირმინისტრმა აღნიშნა, ახლა გამოძიებას უნდა მიეცეს საშუალება, რომ სრული სურათი გახდეს ცნობილი.
„სამართალდამცავ უწყებებს ჰქონდათ მყარი საფუძველი იმ ქმედებებისთვის, რაც განახორციელეს. მხედველობაში მაქვს, როგორც დაკავება, ასევე გამოძიების გაგრძელება. ამის შემდეგ, ჩვენ, გამომდინარე საქართველოს ეკლესიის, როგორც სახელმწიფოებრივად მნიშვნელოვანი ინსტიტუციისადმი ნდობის შენარჩუნების კუთხით და ასევე იმიტომ რომ ჩვენთვის უმნიშვნელოვანესია ეკლესიის ერთიანობა, ჩვენ მაქსიმალურად, დღემდე ვცდილობთ თავი შევიკავოთ გამოძიების მასალების გამოქვეყნებისგან. ასევე ამას ვაკეთებთ, რა თქმა უნდა გამოძიებისა და უსაფრთხოების ინტერესებიდან გამომდინარე“ - განაცხადა გიორგი კვირიკაშვილმა.
საქართველოს პრემიერმინისტრის თქმით, სამწუხაროა, რომ საზოგადოებისა და ეკლესიის ზოგიერთი წარმომადგენლის მხრიდან იყო საკმაოდ უსამართლო და არაადეკვატური რეაქცია.
„მე მინდა ვთქვა, რომ ჩვენ, რა თქმა უნდა, მოვითხოვთ უფრო მეტ ნდობასა და პატივისცემას სახელმწიფო ინსტიტუტების მიმართ. ასევე მინდა განვაცხადო, რომ პატრიარქის ოპერაციის წინა დღეს გავუფრთხილდით პატრიარქს, არ გვინდოდა მისი აღელვება და თავი შევიკავეთ დაკავების ინფორმაციის გამოქვეყნებისგან. სამწუხაროდ, ასე არ მოიქცა ერთ-ერთი მედიასაშუალება და გამოაქვეყნა ეს ინფორმაცია და შემდეგ ჩვენ მოგვიწია მოპასუხის რეჟიმში ყოფნა და ამ პირობებშიც, ჩვენ თავი შევიკავეთ გამოძიების მასალების გამოქვეყნებისგან“ - განაცხადა გიორგი კვირიკაშვილმა.
პრემიერმინისტრი იმედს გამოთქვას, რომ მას შემდეგ, რაც პატრიარქი საქართველოში დაბრუნდება და მიიღებს სრულ ინფორმაციას ამ საკითხის ირგვლივ, მას ექნება შესაბამისი პოზიცია.
პროკურატურამ საპატრიარქოს ქონების მართვის სამსახურის ხელმძღვანელი, დეკანოზი გიორგი მამალაძე მკვლელობის მომზადების ბრალდებით დააკავა.
უწყების ცნობით, დეკანოზი ერთ-ერთი პირის ციანიდით მოწამვლას აპირებდა. პროკურატურა არ აკონკრეტებს, ვის მკვლელობას ამზადებდა საპატრიარქოს ქონების მართვის სამსახურის ხელმძღვანელი. დეკანოზი გიორგი მამალაძე წარდგენილ ბრალდებას არ აღიარებს.