ნიკა გვარამიას შემდეგ სასამართლოში დღეს მამუკა ახვლედიანი დაკითხეს. საქალაქო სასამართლოს ყოფილმა თავმჯდომარემ ჩვენება მასა და "რუსთავი ორის" გენერალურ დირექტორს შორის გამართული საუბრის ამსახველ ფარულ ჩანაწერთან დაკავშირებით მისცა.
ახვლედიანი გვარამიასთან თანხაზე საუბარს კატეგორიულად უარყოფს და მასალას დამონტაჟებულად აცხადებს. დაკითხვიდან გამოსულმა ახვლედიანმა თქვა, რომ გამოძიებას ხელისუფლების მაღალი პირის სახელი და გვარი აცნობა, რომელიც მის და გვარამიას საუბარს ესწრებოდა.
ასევე, ახვლედიანი არ ადასტურებს გვარამიას მიერ გავრცელებულ იმ ინფორმაციას, რომლის მიხედვით, "რუსთავი 2-ის" გენერალური დირექტორი ამტკიცებს, რომ აუდიოჩანაწერი თავად მოამზადა.
ახვლედიანის მტკიცებით, სხვა პირების დასწრების გარეშე მას ნიკა გვარამიასთან პირისპირ არასდროს უსაუბრია.