რეზონანსულ საქმესთან დაკავშირებით პროკურატურის გუშინდელი განცხადება ოპოზიციის მწვავე კრიტიკის საგანი გახდა.
საუბარია იმ განცხადებაზე, რომელშიც საგამოძიებო უწყება დეკანოზ მამალაძის წინააღმდეგ მიმდინარე გამოძიების არასწორ ინტერპრეტაციაზე მიუთითებს და განმარტავს, რომ მამალაძე პატრიარქის მოწამვლას არ გეგმავდა.
საპარლამენტო ოპოზიცია პროკურატურას სიცრუის ტირაჟირებაში და აჟიოტაჟის შექმნაში ადანაშაულებს, მის უკან კი ხელისუფლების ინტერესებს ხედავს.
ბრალდებები ისმის მმართველი გუნდის მხრიდანაც, რომლის წარმომადგენლებიც ოპენენტების გამოხმაურებას სპეკულაციას უწოდებენ.
ხელისუფლება საზოგადოებას სთხოვს, გამოძიების შედეგებს დაელოდონ. პარლამენტის თავმჯდომარე კი მიმდინარე გამოძიების დასრულებამდე პოზიციის დაფიქსირებისგან თავს იკავებს.
ირაკლი კობახიძეს მიაჩნია, რომ საზოგადოების წინასწარი დასკვნები გამოძიების მიმდინარეობას დააზიანებს.