თბილისის ოლიმპიურ სასახლეში დასრულდა საქართველოს ჩემპიონატი ბერძნულ-რომაული სტილით ჭიდაობაში. დღეს მედლების კომპლექტები დარჩენილ ოთხ წონით კატეგორიაში გათამაშდა.

66 კილოგრამში ჩემპიონი სამტრედიელი, გიგა გოგიბერაშვილი გახდა, 75-ში ოქროს მედალი აჭარის წარმომადგენელმა, გელა ბოლქვაძემ მოიპოვა, 85 კილოგრამ წონით კატეგორიაში პირველი ადგილი გარდაბნელმა რობერტ კობლიაშვილმა დაიკავა, ხოლო მძიმეში მცხეთელმა, ლევან არაბულმა გაიმარჯვა.

ჩემპიონატის შედეგების მიხედვით, ჩამოყალიბდება ეროვნული ნაკრები, რომელიც 2-დან 7 მაისის ჩათვლით, ბელგრადში გასამართ, ევროპის ჩემპიონატზე ისაპარეზებს.