ნატო-ს გენერალური მდივანი ალიანსის სამხედრო ბიუჯეტის ზრდას აუცლებლად მიიჩნევს. ამის შესახებ მან შეერთებული შტატების თავდაცვის მდივანთან დაგეგმილ შეხვედრამდე განაცხადა.
იენს სტოლტენბერგის განცხადებით, გასულ წელს ნატოს ხარჯები 10 მილიარდი დოლარით გაიზარდა. მისი თქმით, აუცილებელია ამ პროცესის გაგრძელება.
შეერთებული შტატების მოთხოვნის საფუძველზე, 2014 წელს დადებული შეთანხმებით, ევროპული სახელმწიფოები მომდევნო 10 წლის განმავლობაში ალიანსის თავდაცვისთვის მთლიანი შიდა პროდუქტის 2 პროცენტამდე კონტრიბუციას დათანხმდნენ.
გენერალური მდივანი წევრი ქვეყნებისგან ამ შეთანხმების პირობების დაცვას მოითხოვს. ანალოგიური მოთხოვნები აქვს პრეზიდენტ ტრამპსაც. როგორც ცნობილია, ნატოს ბიუჯეტის 70 პროცენტს სწორედ შეერთებული შტატები ავსებს.