ადამიანის უფლებათა დაცვის საპარლამენტო კომიტეტმა პენიტენციურ სისტემაში დაგეგმილ ცვლილებებათა პაკეტს მხარი დაუჭირა.
“პატიმრობის კოდექსში“ შესატანი ცვლილებები და მისი თანმდევი პროექტები კომიტეტის წევრებს პირველი მოსმენით სასჯელაღსრულებისა და პრობაციის მინისტრმა კახა კახიშვილმა გააცნო.
მთავრობის მიერ პარლამენტისთვის შეთავაზებული პროექტი სასჯელაღსრულების სისტემაში სპეციალური დაწესებულების შექმნას ითვალისწინებს, სადაც პატიმრებს გათავისუფლებისთვის მოამზადებენ.
დაგეგმილია შინაპატიმრობის ინსტიტუტის ამოქმედება. პარლამენტში ინიცირებული პროექტის მიხედვით, მსჯავრდებულებს უმაღლესი განათლების მიღების უფლება ექნებათ.
ამავე ცვლილებების ფარგლებში გათვალისწინებულია სიახლე, რომლის მიხედვით, იმ ქალ მსჯავრდებულებს, რომელთა მცირეწლოვან შვილებს თავისუფლების აღკვეთის დაწესებულების დატოვება მოუწევთ, ერთი წლის განმავლობაში, უქმე დღეებში დაწესებულებიდან გასვლის უფლება ექნებათ.
პარლამენტში ინიცირებული პროექტით დაგეგმილია პენიტენციური დაწესებულების გარე პერიმეტრზე სპეციალური ამკრძალავი წესების შემოღება.