რამდენიმე ეპისკოპოსთან შეხვედრას ითხოვს დეკანოზი გიორგი მამალაძე. მაღალი იერარქიის სასულიერო პირის მკვლელობის მომზადების ბრალდებით დაკავებული მე-8 დაწესებულებაში დღეს ომბუდსმენმა და უფლებადამცველი ორგანიზაციის წარმომადგენელმა მოინახულეს.
დაკავებული სასულიერო პირის ადვოკატი კი პროკურატურას ოფიციალური წერილით მიმართავს და ინფორმაციის შინაარსობრივი მხარის გასაჯაროებაზე უფლების მოპოვებას ითხოვს.
საქმეზე გაკეთებული განცხადებებისა და გაუთქმელობის დოკუმენტზე დაცვის მხარის ხელმოწერების გამო, უფლებადამცველები უდანაშაულობის პრეზუმფციის დარღვევაზე აკეთებენ განცხადებას.
პროკურატურამ საპატრიარქოს ქონების მართვის სამსახურის ხელმძღვანელი, დეკანოზი გიორგი მამალაძე მკვლელობის მომზადების ბრალდებით დააკავა. უწყების ცნობით, დეკანოზი მაღალი იერარქიის სასულიერო პირის ციანიდით მოწამვლას აპირებდა. პროკურატურა არ აკონკრეტებს, ვის მკვლელობას ამზადებდა საპატრიარქოს ქონების მართვის სამსახურის ხელმძღვანელი. დეკანოზი გიორგი მამალაძე წარდგენილ ბრალდებას არ აღიარებს.