13 მოქალაქის დაკავებით დასრულდა საპროტესტო აქცია თბილისის მერიასთან. „ნაციონალური მოძრაობის“ მიერ ორგანიზებული პროტესტი სამართალდამცველებთან დაპირისპირებაში გადაიზარდა.
ოპოზიციური პარტიის წევრები, მერიის მიერ მოსამართლე ნატა ნაზღაიძის ოჯახისთვის საკომპენსაციო ღონისძიებებს აპროტესტებდნენ.
ქალაქის მთავრობის გადაწყვეტილებით, „რუსთავი ორის“ საქმის განმხილველი მოსამართლის ოჯახმა, ვერეს ხეობაში მიწის ნაკვეთის სანაცვლოდ, როგორც ნიკა მელია აცხადებს, რამდენიმემილიონიანი ქონება საბურთალოზე მიიღო.
მერიასთან დაპირისპირება მას შემდეგ დაიწყო, რაც საპროტესტო აქციის წევრებმა შენობაში შევლა სცადეს, რისი უფლებაც მათ ადგილზე მობილიზებულმა სამართალდამცველებმა არ მისცეს.
ინციდენტის შემდეგ, აქციის წევრებმა მერიიდან შინაგან საქმეთა სამინისტროს მიმართულებით მსვლელობა მოაწყვეს.