აშშ-საქართველოს შორის უსაფრთხოების სფეროში გაფორმებული სამწლიანი თანამშრომლობის ჩარჩო- დოკუმენტით განსაზღვრული ორმხრივი თანამშრომლობის ამოცანები და მტკიცე თავდაცვითი შესაძლებლობების განვითარება - ის მთავარი საკითხები იყო, რაზეც საქართველოს თავდაცვის მინისტრმა ლევან იზორიამ ამერიკელ გენერლებთან და აშშ-ის არმიის ევროპული ჯარების სარდალთან, გენერალ-ლეიტენანტ ბენ ჰოჯესთან გერმანიაში, ჰოჰენფელზის სამხედრო ბაზაზე შეხვედრისას განიხილა.
ლევან იზორიამ გენერალ ჰოჯესთან საქართველოს თავდაცვის მზადყოფნის პროგრამის ამოქმედების გეგმებზე ისაუბრა, რაც 2017 წელს, საქართველოში ჰოჰენფელზის მსგავსი საბრძოლო მომზადების ცენტრის მშენებლობას ითვალისწინებს. მზადყოფნის პროგრამის შემდგომი დეტალების შესაჯერებლად კი, საქართველოს უახლოეს მომავალში ამერიკელი გენერალი ესტუმრება.
თავდაცვის მინისტრი დელეგაციის სხვა წევრებთან ერთად გერმანიაში, აშშ-ის ევროპის სარდლობის მე-7 არმიის საწვრთნელ ბაზას ესტუმრა, სადაც ავღანეთისთვის გადასროლისწინა სწავლებას საქართველოს შეიარაღებული ძალების II ქვეითი ბრიგადის 23-ე ბატალიონი გადის.
საქართველოს დელეგაციისთვის აშშ-ის ევროპის სარდლობის მე-7 არმიის საწვრთნელ ბაზაზე, ქართველი სამხედროების მონაწილეობით, სპეციალური საჩვენებელი სწავლება ჩატარდა, სადაც ვითარება ავღანეთში არსებულ გარემოსთან მაქსიმალურადაა მიახლოებული.