საზოგადოებრივი მაუწყებლის ახალ სტრატეგიასთან დაკავშირებით პირველ განცხადებას აკეთებს მაუწყებლის გენერალური დირექტორი ვასილ მაღლაფერიძე.
რამდენიმე წუთის წინ მან "მოამბესთან" კომენტარში განმარტა, რომ მომავალ კვირას სატელევიზიო ბადეში ყველა დაგეგმილი გადაცემა უცვლელად იქნება და გავრცელებული ინფორმაცია მათი დახურვის შესახებ სიმართლეს არ შეესაბამება.
შეგახსენებთ, რომ კოალიციამ ,,მედიის ადვოკატირებისთვის" გუშინ გაავრცელა ინფორმაცია საზოგადოებრივ მაუწყებელში მიმდინარე რეორგანიზაციასთან დაკავშირებით, რომლის თანახმადაც, კოალიციის განცხადებით, მაუწყებელში საზოგადოებრივ-პოლიტიკური გადაცემების დახურვა და თანამშრომელთა მასობრივი დათხოვნაა მოსალოდნელი.
ახალი გენერალური დირექტორი კი თავისი სტრატეგიის გაცნობას საზოგადოებისთვის დეტალურად 6 თებერვალს დაგეგმილ პრესკონფერენციაზე აპირებს.