რა არის საჭირო შენგენის ზონაში უვიზოდ მოგზაურობისთვის - საქართველოს მთავრობა საინფორმაციო კამპანიას იწყებს.
აღმასრულებელ ხელისუფლებაში იმ პროცედურებს განმარტავენ, რაც საქართველოს მოქალაქემ ევროკავშირში სამოგზაუროდ უნდა გაიაროს.
ევროპის 30 ქვეყანაში თავისუფლად მიმოსვლა, სავარაუდოდ, მარტის ბოლოდან გახდება შესაძლებელი.
მინისტრთა კაბინეტში ე.წ. შეჩერების მექანიზმის ამოქმედების პირობებსაც განმარტავენ, თუმცა მიიჩნევენ, რომ მექანიზმის ამოქმედების რისკი არ არსებობს, რადგან საქართველომ ამ მიმართულებით ყველა ნაკისრი ვალდებულება შეასრულა. უვიზო რეჟიმის ასამოქმედებლად მხოლოდ ტექნიკური პროცედურებია დარჩენილი.
საბოლოო გადაწყვეტულება ევროპარლამენტსა და ევროსაბჭოს შორის უნდა მოხდეს, რის შემდეგაც ხელმოწერილი დოკუმენტი ევროპარლამენტის საკანონმდებლო მაცნეში გამოქვეყნდება. აღნიშნულიდან 20 დღის შემდეგ კი საქართველოს მოქალაქეებს შენგენის ზონაში თავისუფლად მოგზაურობა შეეძლებათ.