თეთრი სახლის განმარტებით, მუსლიმური ქვეყნების მოქალაქეებზე დაწესებული შეზღუდვები, რომელიც შეერთებული შტატების ტერიტორიაზე შესვლას კრძალავს, ე.წ. მწვანე ბარათის მფლობელებს არ შეეხებათ. ამის შესახებ განცხადებას პრეზიდენტის აპარატის უფროსი რაინ პრიბუსი აკეთებს. მისი თქმით, იმ მოქალაქეებს, რომელთა პასპორტიც ე.წ. შავ სიაში შესულ ქვეყნებში ვიზიტებს ასახავს, შეერთებული შტატების საზღვარზე დამატებითი შემოწმების გავლა მოუწევთ. პრეზიდენტის განკარგულებით, შვიდი ქვეყნის: ირანის, ერაყის, იემენის, ლიბიის, სირიის, სომალისა და სუდანის მოქალაქეებს შეერთებული შტატების ტერიტორიაზე შესვლა 90 დღის განმავლობაში ეზღუდებათ. გაურკვეველი ვადით შეწყდება ასევე სირიელი ლტოლვილების მიღებაც. ეს ზომები არ შეეხებათ, რელიგიური ნიშნით დევნილ ლტოლვილებს, განსაკუთრებით კი ქრისტიან სირიელებს.