ოკუპირებული აფხაზეთის ტერიტორიაზე პატიმრობამისჯილი გიორგი ლუკავას ოჯახის წევრები მისი ადგილსამყოფელის გარკვევას ცდილობენ.
მათი განცხადებით, აფხაზეთის ომის მონაწილე ოჯახს ტელეფონით დაუკავშირდა და შეატყობინა, რომ დრანდის ციხიდან მისი სხვაგან გადაყვანა იგეგმებოდა. ამის შემდეგ დაკავებულთან კონტაქტი შეწყდა. ოჯახის წევრები ვარაუდობენ, რომ ის მოკლულია. ლუკავას ახლობლები ხელისუფლებისგან დახმარებას ითხოვენ. წინააღმდეგ შემთხვევაში, საპროტესტო აქციებით იმუქრებიან.
საქმეს უკვე გამოეხმაურა სახელმწიფო უსაფრთხოების სამსახური. გავრცელებული განცხადების მიხედვით, მომხდართან დაკავშირებით, ევროკავშირის მონიტორინგის მისიას ინფორმაცია უკვე აქვს. მათი მეშვეობით გააქტიურდა ცხელი ხაზი.
"აფხაზეთის დე ფაქტო ხელისუფლება არ ადასტურებს ლუკავას ციხიდან გაყვანის ფაქტს. საერთაშორისო ორგანიზაციებთან ერთად, ლუკავას საქმეზე მუშაობა გრძელდება", - ნათქვამია განცახდებაში.
გიორგი ლუკავა ოკუპირებული აფხაზეთის ტერიტორიაზე 5 წლის წინ დააკავეს და უვადო პატიმრობა მიუსაჯეს.