ხმაური იყო დღეს დილიდან რუსთავის აზოტის საწარმოს მიმდებარე ტერიტორიაზე. ქარხნის შესასვლელთან თანამშრომლები მათ გათავისუფლებას აპროტესტებდნენ.
მათი განმარტებით, აზოტის ქარხნის ახალმა ხელმძღვანელმა 350-მდე თანამშრომელი სამსახურიდან ყოველგვარი გაფრთხილების გარეშე გაათავისუფლა. დილით მისულ მუშებს საშვები დაბლოკილი დახვდათ და ახალ ხელშეკრულებებზე ხელი აღარ მოაწერინეს.
აზოტის ხელმძღვანელობა ამ ეტაპზე კომენტარს არ აკეთებს. პრესსამსახურის განმარტებით შეიცვალა ქარხნის მეპატრონე და ახლა უკვე სააქციო საზოგადოება „აზოტის ქარხნის“ ადმინისტრაცია თანამშრომელთა სამსახურში თავიდან აყვანას ახორციელებს.
პროფკავშირების განმარტებით კი დარღვეულია შრომის კოდექსი და თანამშრომელთა ამ ფორმით გათავისუფლებას ისინი სასამართლოში გაასაჩივრებენ.