2017 წელს ევროვიზიაზე საქართველოს თაკო გაჩეჩილაძე წარადგენს. საკუთარი სიმღერით - Keep the Faith სწორედ ის წარდგება მაყურებლის წინაშე.
კონკურსის გამარჯვებული მაყურებელმა და საერთაშორისო ჟიურიმ ხმის მიცემის შედეგად გამოავლინეს. მაყურებლის სმს-დან შემოსული თანხა დიმიტრი ცინცაძის საქველმოქმედო ფონდში გადაირიცხა.
თაკო გაჩეჩილაძემ ჟიურის წევრებისა და გულშემატკივრებისაგან ჯამში 122 ქულა მოიპოვა.
საქართველოს შიდაშესარჩევ ტურში სულ 25 კონკურსანტი მონაწილეობდა. შოუს პირდაპირი ტრანსლაცია საზოგადოებრივი მაუწყებლის პირველმა არხმა განახორციელა.
საქართველო ევროფესტივალზე მეათედ წარადგენს კონკურსანტს. ევროვიზიის სიმღერის რიგით 62-ე კონკურსს კიევი მასპინძლობს. გრანდიოზული შოუს ნახევარფინალები 9 და 11, ხოლო ფინალი 13 მაისს გაიმართება.