ვაშინგტონში, აშშ-ის 45-ე პრეზიდენტის დონალდ ტრამპის ინაუგურაციისთვის ემზადებიან.

20 იანვარს, დილით, დონალდ ტრამპი და ვიცეპრეზიდენტი მაიკლ პენსი ოჯახებთან ერთად, წმინდა იოანეს ეკლესიას ეწვევიან. ამის შემდეგ ბარაკ ობამა და მიშელ ობამა ტრამპს და მის მეუღლეს თეთრ სახლში მიიღებენ.

თბილისის დროით 18:30 საათზე, ინაუგურაციის ცერემონია გაიხსნება მუსიკალური წარმოდგენით.

თბილისის დროით 21:00 საათზე ტრამპი აშშ-ის უზენაესი სასამართლოს თავმჯდომარის თანდასწრებით ფიცს დადებს. ფიცის დადებისას ორ ბიბლიას გამოიყენებენ: აბრაამ ლინკოლნის პირად ბიბლიას, რომელიც ინაუგურაციის ცერემონიის განუყოფელ ნაწილად იქცა და ტრამპის პირად ბიბლიას, რომელიც მას დედამ 1955 წელს აჩუქა.

ინაუგურაციის ცერემონიას დაესწრებიან აშშ-ის კონგრესის წევრები, უზენაესი სასამართლოს მოსამართლეები, დიპლომატიური კორპუსის წარმომადგენლები, საზოგადო მოღვაწეები.

ასევე, ცერემონიას აშშ-ის ყოფილი პრეზიდენტები, ჯიმი კარტერი, ბილ კლინტონი და ჯორჯ ბუში უმცროსი დაესწრებიან. აშშ-ის ეროვნულ ჰიმნს შეასრულებს 16 წლის მომღერალი ჯეკი ივანკო.