თურქეთში ახალი წლის ღამის გასართობ კლუბზე განხორციელებულ თავდასხმაში მთავარმა ბრალდებულმა დანაშაული აღიარა.
თურქმა სამართალდამცველებმა ღამის კლუბ "რეინაში" მომხდარი თავდასხმის ორგანიზატორი, უზბეკური წარმოშობის აბდულგადირ მაშარიპოვი გასულ ღამეს დააკავეს.
ის პოლიციამ სტამბოლის ერთ-ერთ გარეუბანში სპეცოპერაციის შედეგად აიყვანა. მაშარიპოვის დასაკავებლად კონტროლის კამერებიდან 7500 საათის ხანგრძლივობის ჩანაწერების ანალიზი მოხდა. მის დასაკავებლად ჩართული იყო ორი ათასამდე პოლიციელი.
ადგილობრივი მედიის ინფორმაციით, ეჭვმიტანილი ახლობლის ბინაში 2 კვირის განმავლობაში იმალებოდა. მასთან ერთად, პოლიციამ კიდევ 4 პირი დააკავა. სტამბოლის ღამის კლუბში 1 იანვრის ღამეს განხორციელებულ თავდასხმას 39 ადამიანის სიცოცხლე ემსხვერპლა. დაკავების დეტალებზე სტამბოლის გუბერნატორმა ისაუბრა.