სამუშაო ადგილები, ფასების ზრდა/ინფლაცია, სიღარიბე, ტერიტორიული მთლიანობა, პენსიები, - ესაა ეროვნული საკითხების ხუთეული, რომელსაც გამოკითხულები მათთვის და მათი ოჯახებისთვის მნიშვნელოვნად მიიჩნევენ. ამის შესახებ „ეროვნულ-დემოკრატიული ინსტიტუტის“ კვლევაშია ნათქვამი, რომელიც 2016 წლის 4 ნოემბრიდან 4 დეკემბრის ჩათვლით ჩატარდა.

ორგანიზაციის ცნობით, მოსახლეობისთვის პრიორიტეტული საკითხების ხუთეული 2009 წლის შემდეგ არ შეცვლილა.

კითხვაზე, როგორი მიმართულებით ვითარდება საქართველო, 32% პასუხობს, რომ სწორი, 36 % თვლის, რომ საქართველო საერთოდ არ იცვლება, 27 % კი არასწორ მიმართულებას ასახელებს.

გასული ორი წლის მონაცემებთან შედარებით, გაზრდილია იმ ადამიანთა რიცხვი, ვინც ქვეყნის სწორ განვითარებაზე საუბრობს, ხოლო შემცირებულია მათი რაოდენობა, ვინც მიმართულებას არასწორად მიიჩნევს. თუმცა, აღნიშნული მაჩვენებელი მაინც დაბალია 2011-14 წლებში დაფიქსირებულ შედეგებთან შედარებით.