კახა კალაძე კომპანია „გაზპრომ-ექსპორტის” ხელმძღვანელობას დღეს შეხვდება. აუდიენცია მინკსში, სამუშაო ვიზიტის ფარგლებშია დაგეგმილი.
აღნიშნულ ინფორმაციას ენერგეტიკის სამინისტრო ავრცელებს.
უწყებაში აცხადებენ, რომ კომპანია „გაზპრომ-ექსპორტის“ ხელმძღვანელობასთან სამუშაო შეხვედრაზე, რუსეთიდან სომხეთის მიმართულებით, ბუნებრივი აირის ტრანზიტის საკითხი განიხილება. შეგახსენებთ, რუსულ კომპანიას სურს საქართველოს, სომხეთისთვის გატარებული გაზის 10%-ი თანხობრივად გადაუხადოს და არა თავად პროდუქტის სახით. ქართული მხარისთვის კი რუსული კომპანიის შეთავაზება არამიმზიდველია.
ენერგეტიკის მინისტრი ამბობს, რომ საქართველო რუსეთს გაზის ტრანზიტის სანაცვლოდ ფინანსურ ანაზღაურებაზე გადასვლას მხოლოდ იმ შემთხვევაში დათანხმდება, თუ იგივე სარგებელს მიიღებს, რასაც პროდუქციის შემთხვევაში იღებდა.