თურქეთის საგარეო საქმეთა მინისტრის განცხადებით, თურქეთისთვის რუსეთთან თანამშრომლობა მნიშვნელოვანია, მაგრამ საქართველოს შესახებ ანკარა პოზიციებს არ გადახედავს. სააგენტო „ანადოლუს“ ინფორმაციით, ამის შესახებ მევლუთ ჩავუშოღლუმ ანკარაში, ელჩების მე-9 კონფერენციაზე გამოსვლისას განაცხადა. მისი თქმით რუსეთთან დიალოგი მრავალი კონფლიქტის დარეგულირების საშუალებას იძლევა, თურქეთისთვის რუსეთთან თანამშრომლობა მნიშვნელოვანია, მაგრამ ეს არ ითვალისწინებს ანკარას პოზიციის გადახედვას უკრაინისა და საქართველოს კონფლიქტებთან დაკავშირებით.
„ჩვენ მხარს ვუჭერთ უკრაინისა და საქართველოს ტერიტორიულ მთლიანობას“, - განაცხადა მინისტრმა. მანვე ყურადღება გაამახვილა რუსეთთან ერთად სირიის საკითხზე ურთიერთქმედებებთან დაკავშირებით და განაცხადა, რომ თურქეთი ყველა ქვეყნისგან განსხვავებით, ყველაზე მეტად არის დაინტერესებული, რომ სირიაში მშვიდობა იყოს და ანკარა ყველაფერს აკეთებს, რომ ამ ქვეყნის ტერიტორიაზე ზავი დამყარდეს.