უზენაესმა სასამართლომ პროკურატურის სარჩელი დააკმაყოფილა და ბექა-საბი ბერიანის მკვლელობაში ბრალდებული პირი დამნაშავედ სცნო.

საუბარია ლევან კოჭლაშვილზე, რომელსაც საგამოძიებო უწყება ბერიანის მკვლელობასა და ბიანკა შიგუროვაზე ფიზიკურ ძალადობაში ადანაშაულებდა.

პროკურატურის ინფორმაციით, კოჭლაშვილმა 2014 წლის 10 ნოემბერს ბუხაიძის ქუჩაზე ტრანსგენდერ შიგუროვას სხეულზე დაზიანებები მიაყენა, მოგვაინებით კი პეკინის ქუჩაზე მცხოვრები ტრანსგენდერი საბი ბერიანი, განზრახ მოკვლის მიზნით, სასიკვდილოდ დაჭრა.

პროკურატურის განცხადების მიხედვით, საქალაქო სასამართლომ ბრალდებული განზრახ მკვლელობის ნაწილში უდანაშაულოდ ცნო და მხოლოდ 4-წლიანი პატიმრობა მიუსაჯა,

განაჩენი ძალაში დატოვა სააპელაციო სასამართლომაც, უზენაესმა სასამართლომ კი პროკურატურის მტკიცებულებები გაიზიარა, კოჭლაშვილი ყველა წარდგენილ ბრალში დამნაშავედ ცნო და 10-წლიანი პატიმრობა მიუსაჯა.