სირიელი მეამბოხეები მიმდინარე თვის ბოლოს ყაზახეთში დაგეგმილ სამშვიდობო მოლაპარაკებებში მონაწილეობის მიღებაზე უარს აცხადებენ და ასადის მთავრობას ცეცხლის შეწყვეტის რეჟიმის დარღვევაში ადანაშაულებენ.
განცხადებაში განმარტებულია, რომ მეამბოხე ძალები მკაცრად იცავენ ცეცხლის შეწყვეტის შეთანხმების პირობებს, თუმცა, ირანელი მოკავშირეების მხარდაჭერით, სამთავრობო ძალებმა არაერთხელ გახსნეს ცეცხლი დამასკოს გარეუბანსა და ვადი-ბარადას მიდამოებში.
მეამბოხე ძალების განცხადებით, იმ შემთხვევაში, თუ ასადის ძალები სიჩუმის რეჟიმს ტერიტორიების მიტაცებისთვის გამოიყენებენ, ოპოზიცია ამ შეთანხმებიდან გავა.
31 დეკემბერს გაეროს უშიშროების საბჭომ ცეცხლის შეწყვეტის მხარდაჭერისა და სამშვიდობო მოლაპარაკებების დაწყების შესახებ რუსეთის მიერ შედგენილ რეზოლუციას ერთხმად დაუჭირა მხარი.