ტრანსგენდერი ქალის, საბი ბერიანის მკვლელობაში ბრალდებულს უზენაესმა სასამართლომ 10 წლით თავისუფლების აღკვეთა შეუფარდა, ამის შესახებ ინფორმაცია საზოგადოებრივ მაუწყებელს, ადვოკატმა ციალა რატიანმა მიაწოდა.

მისი თქმით, აღნიშნული გადაწყვეტილება საბოლოოა და გასაჩივრებას არ ექვემდებარება.

მკვლელობაში ბრალდებული ორი ინსტანციის სასამართლომ დამნაშავედ სცნო სხვისი ნივთის დაზიანებაში და 4 წლით თავისუფლების აღკვეთა მიუსაჯა, განზრახ მკვლელობის ნაწილში გაამართლა.

უზენაესმა სასამართლომ თბილისის საქალაქო და სააპელაციო სასამართლოების გადაწყვეტილებები არ გაიზიარა და ბრალდებული მკვლელობის ნაწილშიც გაამტყუნა.

საბი ბერიანი 2015 წლის 11 ნოემბერს საკუთარ ბინაში მოკლეს.