თავდაცვის მინისტრმა 2016 წელი მედიასთან შეაჯამა. ლევან იზორიას განცხადებით, ოპტიმიზაციის პროცესი უწყებაში მმართველი რგოლიდან დაიწყო, რაც მრჩეველთა ინსტიტუტის გაუქმებაში გამოიხატა.
ამის შედეგად 389 556 ლარი დაიზოგა. იზორიას თქმით, სამინისტროს ახალმა ხელმძღვანელობამ მოსვლისთანავე შეიმუშავა სისტემური ხარვეზების აღმოფხვრისა და უწყების სტრატეგიული განვითარების გეგმა.
რეფორმის მიზანი, ქვეყნის ეროვნული ინტერესებიდან გამომდინარე, არსებული საფრთხეების გათვალისწინებით, ნატო-სთან თავსებადი თავდაცვისუნარიანი შეიარაღებული ძალების შექმნა და სრულყოფაა, რაც უწყებაში ადმინისტრაციული ხარჯების დაზოგვის, ბიუროკრატიული აპარატის შემცირების, დუბლირებული ფუნქციების აღმოფხვრის და უფუნქციო საშტატო ერთეულების გაუქმების გზით უნდა განხორციელდეს.
მინისტრის თქმით, კომპენსაცია გადაეცა 209 გათავისუფლებულ ოფიცერს.
დღესვე ცნობილი გახდა, რომ საქართველო 2017 წლის ნატოს სამიტზე წარმოდგენილი არ იქნება. მიზეზად სამიტის თემატიკა სახელდება, რომელშიც, იზორიას განმარტებით, მხოლოდ ნატოს წევრი ქვეყნები მონაწილეობენ.