საშემოდგომო სესია ხმაურიანი განცხადებებით დასრულდა.
რიგგარეშე სხდომაზე ,,საქართველოს პატრიოტებმა” პროტესტის გასხვავებულ ფორმას მიმართეს და ტრიბუნებიდან მუშტების ბრახუნით ოპოზიციონერ დეპუტატს ზურაბ ჭიაბერაშვილს გამოსვლა რამდენჯერმე შეაწყვეტინეს.
,,ნაციონალური მოძრაობის” წევრი მიკროფონთან საგარეო პოლიტიკის შესახებ მომზადებული რეზოლუციის პროექტზე საუბრობდა.
ფრაქცია ,,ქართული ოცნების” ავტორობოთ შემუშავებული დოკუმენტი პარლამენტმა დღეს 91-ი ხმით დაამტკიცა.
რეზოლუციის მიხედვით, საქართველოს საგარეო პოლიტიკის უმთავრეს ამოცანად ქვეყნის სუვერენიტეტის განმტკიცება, დეოკუპაცია და მშვიდობიანი გზით ტერიტორიული მთლიანობის აღდგენა ცხადდება.
უალტერნატივო პრიორიტეტად არის დასახელებული ქვეყნის გაწევრიანება ნატო-სა და ევროკავშირში, ქვეყნის მთავარ სტრატეგიულ პარტნიორად და მოკავშირედ კი ამერიკის შეერთებული შტატებია მითითებული.